საქართველოს იუსტიციის სამინისტროს ეროვნულ არქივში დაცულ დოკუმენტებს 2019 წელს 38 817 საქმეში გაერთიანებული წერილობითი დოკუმენტი, 9608 ფოტო, 150 ფონოჩანაწერი და 495 კინოდოკუმენტი შეემატა. მათ შორისაა როგორც სახელმწიფო დაწესებულებების მასალა, ისე კერძო არქივებში დაცული დოკუმენტები.

2019 წელს ეროვნულ საარქივო ფონდს შეემატა საქართველოს ეროვნულ-განმათავისუფლებელი მოძრაობის ერთ-ერთი ლიდერის, მერაბ კოსტავას არქივი - პირადი წერილები და ფოტოები - რომელიც ეროვნულ არქივს მისმა მეუღლემ, რუსუდან ბერიძემ გადასცა.

ამიერიდან არქივში იქნება დაცული ალექსანდრე რეხვიაშვილის მხატვრული ფილმები - „მიახლოება“ და „საფეხური“; ბონდო შოშიტაიშვილის ანიმაციური ფილმები: „ფაკირი“, „კაცუნები“, „განხეთქილების ვაშლი“, „ალიყური“; ნინო ნატროშვილის დოკუმენტური ფილმები: „საქართველოს უკანასკნელი ომი“ და „დემოკრატიული საქართველო“.

გარდა ამისა, არქივის ფოტოკოლექცია გამდიდრდა ველომოგზაურ ჯუმბერ ლეჟავას ფოტოარქივით, რომელიც 1993-2002 წლებში 200-ზე მეტ ქვეყანაში მის მოგზაურობას ასახავს. ეროვნული საარქივო ფონდის ნაწილი გახდა ასევე მუსიკოს რუსუდან ხოჯავასა და ისტორიკოს დემურ გურეშიძის პირადი არქივები.

საქართველოს ეროვნულ არქივში დაცული მასალა ხელმისაწვდომია ყველა დაინტერესებული პირისთვის და მათი გაცნობა ეროვნული არქივის მკვლევართა დარბაზებშია შესაძლებელი.