საქართველოს იუსტიციის სამინისტროს ეროვნული არქივი 9 ივნისს არქივების საერთაშორისო დღეს აღნიშნავს. ამ თარიღთან დაკავშირებით 8-14 ივნისს მსოფლიო არქივების საერთაშორისო კვირეულს ზეიმობს. საქართველოს ეროვნული არქივი არქივების საერთაშორისო დღეს ამჯერად ვიტუალურად უერთდება და კვირეულის ფარგლებში ონლაინსივრცეში არაერთ აქტივობას შემოგთავაზებთ. ვებგვერდსა და ოფიციალურ ფეისბუქის გვერდზე განთავსდება: 8 ივნისი - ვიდეოკოლაჟი ვიტორიო სელას კოლექციის შესახებ; 9 ივნისი - „UNESCO-ს მსოფლიო მეხსიერების რეესტრი. საქართველოს ეროვნულ არქივში დაცული ხელნაწერები“ - სამეცნიერო განყოფილების ხელმძღვანელი ქეთევან ასათიანი ეროვნული არქივის გამოცემასა დაUNESCO-ს მსოფლიო მეხსიერების რეესტრში შეტანილი ქართული ხელნაწერების შესახებ ისაუბრებს; 10 ივნისი - ვირტუალური გამოფენა „საერთაშორისო არქივები“; 11 ივნისი - პროექტი „ძველი და თანამედროვე ბათუმი“; 12 ივნისი - ქვიზი „საქართველოს მწვერვალები“. არქივების საერთაშორისო დღედ 9 ივნისი 2007 წელს არქივების საერთაშორისო საბჭომ დააწესა. ეს თარიღი უკავშირდება 1948 წლის 9 ივნისს, როდესაც გაერთიანებული ერების განათლების, მეცნიერებისა და კულტურის ორგანიზაციამ (UNESCO) არქივების საერთაშორისო საბჭო დააარსა. საქართველოს ეროვნული არქივი წლებია ამ თარიღს საზეიმოდ აღნიშნავს.